Stór, stærri stærstur

Mér hefur aldrei á ævinni þótt ég jafnstór, feit og útlensk eins og í Kína. Kínverjar voru sammála mér. Við fórum að næststærsta vatni Kína en þar á eru afar fallegar eyjar með miklum gróðri, hofum og byggingum síðan guð má vita hvenær. Mjög gaman að sjá.

Ég settist á stein til að hvíla mig og njóta þess að horfa í kringum mig þegar aðvífandi komu pínulitlar kínverskar mæðgur. Dóttirin eitthvað um fertugt og mamman eldgömul. Dóttirin rauk á mig og sagði Fótó, fótó. Ég hélt að hún vildi láta mig taka mynd af þeim mæðgum fyrir sig og stóð upp ekkert nema almennilegheitin. Þá ýtti dóttirin mér aftur niður og sagði Sit, sit. Ég settist alveg ringluð og sú gamla settist þá við hliðina á mér og dóttirin myndaði okkur saman. Höfðu greinilega aldrei á ævinni séð svona stóra og feita kerlingu. Þegar myndatökunni var lokið þökkuðu þær fyrir sig og hurfu á braut.

Bróðir minn hló eins og fífl og sagðist viss um að þær hefðu haldið að ég væri kvenkyns Búdda. Það þótti manninum mínum og syni afskaplega fyndið. Ekki mér.

Athugasemdir

[Simbi Sæfari (IP-tala skráð) 31.3.2008 kl. 15:37]

En hvað kínverjar eiga bágt, hvað þeir eru andlega fátækir að eiga engar tröllskessur.  Kannski þeir eigi ævintýri og sögur um slíkar, held samt ekki.  Í okkar menningu eru elsku skessurnar okkar ómissandi, hvort sem þær eru útdauðar eða ekki.  Hugsið ykkur íslenska sögu án skessanna, no way sko Eitthvað svona álíka og þeirra saga án Budda.

[Kallý, 31.3.2008 kl. 16:20]

já nú hló ég upphátt!  Kvenkyns Búdda!

[Huld S. Ringsted, 31.3.2008 kl. 23:09]

og talarðu við þessa 3 karlmenn í dag?

[Simbi Sæfari (IP-tala skráð) 1.4.2008 kl. 00:15]

Hana nú.....Detta mér allar dauðar og hálfdauðar úr ....  kvenkyns Budda....    Eigum við ekki íslenskan kvenprest sem talar um hana Guð?  Þurfa Guðir endilega að vera með tippi?  Ég get alveg séð fyrir mér flotta Gyðju....liggjandi á kósý (rósrauðu) skýi með hörpu og allt, jafnvel í bikini

[Ásthildur Cesil Þórðardóttir, 1.4.2008 kl. 14:23]

Helga mín þetta hefur ekkert haft með vaxtarlag þitt að gera elskuleg.  Heldur að þú varst útlendingur, og öðruvísi.  Þær hefur langað til að eiga mynd að svona öðruvísi konu.

[Helga Magnúsdóttir, 2.4.2008 kl. 21:15]

Þakka þér fyrir hugulsemina, Ásthildur mín. Er samt ansi hrædd um að þetta hafi haft talsvert með stærð mína og umfang að gera. Er nefnilega stór á alla kanta. Er löngu´búin að fyrirgefa bróður mínum og feðgunum. Finnst þetta bara fyndið.

[Marta B Helgadóttir, 2.4.2008 kl. 23:51]

Fyndin og frábær færsla.

[Linda frænka (IP-tala skráð) 7.4.2008 kl. 13:44]

Hvað ertu hætt að blogga??