Hitt og þetta

Mér er greinilega ekki óhætt að bregða mér af bæ, ekki einu sinni í vinnuna. Þegar ég kom heim á miðvikudaginn hafði maðurinn minn tekið nett kast. Hann var búinn að kaupa nýjan skáp á ganginn, nýtt tölvuborð og geðveikt flottan flatskjá í herbergið hjá Úlfari. Nú er prinsinn kominn með mun flottara sjónvarp hjá sér en við gamla settið höfum í stofunni. Hann hefur það nú jafngott og fangarnir á Litla-Hrauni en mér hefur fundist sumir sjá ofsjónum yfir því að þeir hafi flatskjái.

Ég fór til heimilislæknisins míns í morgun og sýndi honum á mér vinstri höndina þar sem ég get ekki beygt þumalinn og vísifingur. Hann kallaði á kollega sinn og báðir klóruðu sér í kollinum yfir þessu, höfðu aldrei séð svona fyrr. Læknirinn minn ákvað að skrifa bréf til taugasérfræðings og hinn bað hann endilega um að leyfa sér að fylgjast með. Þetta væri svo óvenjulegt og spennandi. Þannig að ég byrjaði daginn á því að gleðja tvo lækna. Það verður spennandi hvað taugasérfræðingurinn hefur um þetta "spennandi" tilfelli að segja.

Ég er að fara með elstu sonardóttur mína á eftir að kaupa handa henni síma. Hún missti símann sinn úti í garði hjá sér en þegar hún ætlaði að ná í hann hafði nágranni slegið blettinn og símann með. Það er vitanlega vonlaust að vera símalaus þegar maður er tólf ára. Svo við drífum okkur eftir vinnu og kaupum síma og fáum okkur svo gott að borða á Ruby Tuesday. Bara gaman.

Athugasemdir

[M, 25.4.2008 kl. 16:16]

Sló símann, hahah  Veit sko alveg hversu mikilvægur sími er fyrir 12 gelgju

[Hrönn Sigurðardóttir, 25.4.2008 kl. 21:49]

Hver er að slá í apríl?

[Ásdís Sigurðardóttir, 25.4.2008 kl. 23:17]

Hvar er sláttur byrjaður?? annars vil ég bra segja til lukku með allt fíneríið.  Gleðilegt sumar

[Halla Rut , 26.4.2008 kl. 09:39]

Hvaða rosa eyðsla er þetta hjá ykkur. Heyrðuð þið ekki að Geir er búin að segja okkar að halda að okkur. Það er að segja allir nema ríkisstjórnin.

En til hamingju með nýju tækin og gleðilegt sumar. 

[Tiger, 26.4.2008 kl. 14:58]

  Já, símalaus geta gelgjur ekki verið - ekkert frekar en strákar geta verið flatskjálausir sko! ...

Þakka þér kærlega mín kæra fyrir að líta við hjá systurminni og óska henni gleðilegs dags í gær! Það gladdi hana mikið og ég var mjög glaður að sjá hve margir gátu gefið sér tíma til að gera það! Knús á þig ljúfan og eigðu yndislega helgi.

[Helga Magnúsdóttir, 27.4.2008 kl. 15:17]

Síminn var sleginn í fyrrasumar. Frökeninni láðist bara að láta ömmu sína vita. Var með eldgamlan síma sem mamma hennar átti og hún dauðskammaðist sín fyrir.

[Guðrún Jóhannesdóttir, 27.4.2008 kl. 17:04]

það þýðir nú ekki að láta barnið burðast með eldgamlan síma;) reyndar fæ ég nú hláturskast þegar ég sé síma næstelsta barnabarnsins, veit ekki af hverju hann virkar, en hann virkar svo sannarlega. Hann fékk nýjan í jólagjöf, en er svo sem ekkert að nota hann hehehehe