Leigubílar og aðrar bílar

Kallarnir mínir fóru í bíó í gærkvöldi svo ég þurfti að taka leigubíl heim. Nú eru þeir á Bob Dylan svo ég þarf aftur að taka leigubíl heim. 1500 kall í hvort skipti og þótt ég sé ekkert sérlega nísk finnst mér það algjörir blóðpeningar að taka leigubíl. En ég rata ekki á stoppistöðina hérna, ætti samt að gera það eftir lýsingar Gurríar á súkkulaðibrekku og fleiru. Veit ekkert hvort einhver strætó stoppar nálægt mér eða hvort ég þarf að skipta eða hvað. Er algjörlega úti í móa hvað strætó varðar. Veit bara að einn sem vann með mér ferðaðist með strætó og það tók hann klukkutíma að komast í og úr vinnu. Því myndi ég aldrei nenna.

Samt er það dálítið asnalegt að sjá eftir peningum í leigubíl. Er á frekar nýjum dýrum bíl. Hann er ekki á bílalánum því við borguðum hann á borðið, laus við lánin allavega. En hann er í kaskó sem er rándýrt. Bensínið kostar orðið hvítuna úr augunum þó svo að maðurinn minn sé með lykil á einhverri lágverðsstöð er rándýrt að reka bílinn. Mér skilst að ef við myndum selja bílinn væri ódýrara að taka leigubíl úr og í vinnu og í innkaupaferðir og svona. Þetta hugsa ég venjulega ekkert út í, bölva því bara að þurfa að eyða þrjú þúsund kalli í leigubíl endrum og eins. Er maður ekki aðeins ruglaður í hvað borgar sig og hvað ekki?

Athugasemdir

[Ragnheiður , 26.5.2008 kl. 21:45]

Hehehe já fólk dauðsér eftir krónunum í mann (leigubílstjórann). Núna er rekstur á leigubílum bara að verða vesen, það er orðið svo dýrt allt í kringum þá.

Stöðin tekur 75000 á mánuði

Leigubílatryggingin er 25,000

Ég bara þori ekki að gá hvað dieselolían kostar á minn á mánuði...

Hafðu það gott skvís

[Helga Magnúsdóttir, 26.5.2008 kl. 22:00]

Úpps. Ég hafði ekkert hugsað út í þetta, bara um mína eigin buddu. Fer bara að taka leigubíl oftar til að sýna þér samstöðu.

[M, 26.5.2008 kl. 22:41]

Eða taka fram hjólið. Hlýtur að vera eitt hjól á heimilinu ;-)

[Ragnheiður , 26.5.2008 kl. 22:51]

Hehehe takk fyrir viljann hehe

[Ásthildur Cesil Þórðardóttir, 26.5.2008 kl. 23:38]

Já ég held að leigubílstjórar séu ekki of sælir af tekjum sínum á þessum síðustu og verstu, og díselolian orðin dýrari en bensín.  Þetta er ótrúlegur andskoti. 

[Hrafnhildur Ýr Vilbertsdóttir, 27.5.2008 kl. 00:01]

við gerðum þetta einn vetur fyrir sirka 6 árum síðan...heilsan var betri því við gengum svo mikið og við spöruðum stórfé...svo var tekin leigubíll í búðir...

já það er örugglega erfitt að reka leigubíl í dag