Til lukku með daginn, Styrmir afastrákur

Hann Styrmir Bolli sonur minn á afmæli í dag. Orðinn 35 ára drengurinn. Rosalega finnst mér ég orðin gömul að eiga hálffertugt barn.

Styrmir hefur alltaf verið yndislegur. Samt var það nú svo að fjölskyldan var sannfærð um að pabbi minn hefði tapað sér að einhverju leyti þegar hann fæddist.  Þessi sex barna faðir og margra barna afi tók þvílíku ástfóstri við drenginn frá fyrstu stundu að annað eins hefur varla sést. Styrmir var ekki einu sinni kominn heim af fæðingardeildinni þegar pabbi var búinn að kaupa rúm svo það væri nú öruggt að drengurinn gæti gist sem oftast hjá afa og ömmu. Þegar hann kom í land kom hann beint heim til mín og sótti drenginn og skilaði honum aftur á leiðinni um borð. Svo fór pabbi að taka hann með sér á sjóinn þegar hann var fimm sex ára.

Styrmir fetaði í fótspor mömmu sinnar og var mjög oft með afa á Grandanum, það þekktu hann orðið allir kallarnir í Kaffivagninum. Einu sinni um mitt sumar þegar verið hafði einmuna blíða og brakandi þurrkur svo dögum skipti komu þeir heim af Grandanum. Styrmir hefur verið svona fjögurra ára og það þurfti engan Einstein til að sjá að hann hafði pissað í buxurnar. Þegar við mamma fórum að býsnast yfir því að hann hefði pissað í buxurnar svona stór strákur héldu þeir því blákalt fram og lugu upp í opið geðið á okkur að hann hefði dottið í poll. Skömmu síðar hurfu þeir og mamma fór inn á bað. Stóð þá ekki hann faðir minn þar og var að þvo buxurnar af drengnum í handlauginni. Þessi maður sem aldrei hafði þvegið svo mikið sem sokk lagði þetta á sig til að eyða sönnunargögnunum.

Einu sinni gisti Styrmir hjá mömmu þegar pabbi var úti á sjó. Hann kom heim eldsnemma morguns og þá var mamma steinsofandi en Styrmir var í afa holu að skoða Andrésblöð og borða kex. Pabbi bað hann um að færa sig og stráksi fór til fóta. Þegar pabbi var kominn upp í og ætlaði að sofna starði Styrmir svo stíft á hann að hann gat ekki sofnað. "Af hverju horfirðu svona á mig, Styrmir minn?" spurði pabbi. "Bráðum brotnar hún," svaraði Styrmir spekingslega. "Brotnar hver?" sagði pabbi forviða. "Kexkakan sem þú liggur á," var svarið og þarf ekki að orðlengja það neitt frekar að pabbi stökk upp úr rúminu til að losna við kexmylsnuna.

Pabbi keypti sér alltaf mjög flotta og dýra bíla og skipti oft. Þegar Styrmir var kominn með bílpróf hringdi afi hans ósjaldan á föstudögum til að bjóða honum bílinn um helgina. Það gekk vitanlega ekki að prinsinn hans væri á einhverjum druslum á rúntinum. Sambandið á milli þeirra var alltaf ákaflega fallegt og saknaði Styrmir afa síns sárt þegar hann lést.

Til hamingju með daginn, kæri frumburður. What would I do without you? 

Athugasemdir

[Hrönn Sigurðardóttir, 2.7.2008 kl. 13:11]

Falleg færsla fyrir einstakan dreng! Til hamingju með daginn bæði tvö

[Jenný Anna Baldursdóttir, 2.7.2008 kl. 13:25]

Yndisleg frásögn.  Til hamingju með strákinn þinn.

Minn frumburður verður 38 ára í desember.  Gettu hvort mér finnst ég ekki hokin af reynslu?

[Hrafnhildur Ýr Vilbertsdóttir, 2.7.2008 kl. 13:55]

Til hamingju með strákinn þinn....fallegt samband sem þú lýsir á milli sonar og afa...

[M, 2.7.2008 kl. 14:31]

Innilega til hamingju með soninn

Þú segir svo skemmtilega frá

[Birna Dis Vilbertsdóttir (IP-tala skráð) 2.7.2008 kl. 15:28]

Falleg færsla.Til hamingju með frumburðinn

[alva (IP-tala skráð) 2.7.2008 kl. 16:33]

Til hamingju með stóra drenginn þinn!! Þeir hafa átt yndislega gott samband afi hans og hann. 

[Helga Magnúsdóttir, 2.7.2008 kl. 17:52]

Takk stelpur. Já, samband þeirra var alveg meiriháttar enda báðir stórkostlegir persónuleikar.

[Ásdís Sigurðardóttir, 2.7.2008 kl. 18:50]

Innilega til hamingju með strákinn þinn, hann hefur átt einstakt samband við afa sinn og muna ávallt lifa í minningu þess alls.  Heppin ertu með son og föður.

[Hulla Dan, 2.7.2008 kl. 19:01]

En dásamlegar minningar og yndislegur pabbi og sonur sem þú átt.

Til hamingju með stráksa.

[Ragnheiður , 2.7.2008 kl. 19:27]

yndisleg saga,hreyfir við manni. Til hamingju með daginn

[siggahg (IP-tala skráð) 2.7.2008 kl. 19:55]

Til hamingju með Styrmi. Hann er flottur eins og þú segir, utan sem innan. Sömuleiðis til hamingju með Úllann um daginn.

Kveðja -

[Heiður Þórunn Sverrisdóttir, 2.7.2008 kl. 21:39]

Til hamingju með frumburðinn Helga.Yndisleg saga um afa og afastrák.

[Edda Agnarsdóttir, 3.7.2008 kl. 10:26]

Falleg færsla - til hamingju með son þinn. Velkomin í bloggvinahópinn.

[Helga Magnúsdóttir, 3.7.2008 kl. 12:23]

Talaði við Styrmi í gærkvöldi vitanlega. Hann þakkaði mér kærlega fyrir að hafa komið því á framfæri að hann hefði pissað í buxurnar þegar hann var fjögurra ára.

[Hrönn Sigurðardóttir, 3.7.2008 kl. 21:44]

oooo þú bætir honum það upp með sögum af sjálfri þér bráðlega

[Tiger, 4.7.2008 kl. 01:48]

 En ljúf og falleg færsla hjá þér um pjakkinn þinn mín kæra. Hann fyrirgefur þér vonandi þó þú hafir látið þjóðina heyra af vætunni, en huggar sig kanski við það að meirihluti þjóðarinnar/mannkynsins hefur lent í þvílíku óhappi líka - og sumir hverjir mun eldri sko - hahaha!

Innilega til hamingju með strákinn/manninn unga - og eigðu ljúfa nótt sem og frábæran dag á morgun kæra Helga.

[Guðrún Jóhannesdóttir, 4.7.2008 kl. 10:36]

innilega til hamingju með guttann þinn þó seint sé mín kæra, frábært samband hafa þeir átt afinn og drengurinn, bara yndislegt Góða helgi

[Elísabet Sigurðardóttir, 4.7.2008 kl. 17:08]

Til hamingju með "litla" drenginn þinn .  Þessi færsla er yndisleg, svo dýrmætt að kynnast góðum afa.

Kær kveðja.