Brotlending í Túnis

Seinasti áfanginn í siglingunni okkar var Túnis. Við fórum í heilsdags skoðunarferð sem var alveg meiriháttar nema að hitinn var vel yfir 40°. Þetta minnti mig á þegar ég fékk bronkittis sem krakki og var látin anda að mér gufu. Þarna var alveg ótrúlega margt að sjá og vildi ég sko alveg fara þarna aftur bara á öðrum árstíma þegar væri kannski aðeins svalara.

Skoðunarferðinni átti að ljúka með því að ganga á fjall, bara lítið en samt fjall, og átti sú ganga að taka 30-40 mínútur. Við gömlu hjónin vorum sko ekki á því að láta draga okkur í fjallgöngu í 40° stiga hita. Við settumst því inn á kaffihús, ef kaffihús skyldi kalla, nokkur borð með hálmsólhlífum og svona hvítum plaststólum eins og fást í Rúmfatalagernum. Við pöntuðum okkur að drekka og ég ætlaði að skreppa á klósettið. Klósettið reyndist argasti viðbjóður og ég hrökklaðist út tautandi og tuðandi. Þegar ég kom aftur að borðinu, öskufúl og alveg að pissa í mig, hlassaði ég mér í stólinn. Stóllinn tók þessum brussugangi illa og mölbrotnaði.

Þarna lá ég, virðuleg kona á sextugsaldri, marflöt í moldarflagi, taskan mín hentist upp í loftið og allt sem í henni var dreifðist jafnt og samviskusamlega úti um allt. Þjónarnir og aðrir gestir komu brunandi til að gá hvort ég væri slösuð, hjálpa mér að skrönglast á lappir og tína saman eigur mínar og koma þeim til mín.

Allir nema einn. Maðurinn sem hafði svarið og sárt við lagt að hann skyldi elska mig og virða í blíðu og stríðu hló svo mikið að ég hélt hann myndi kafna. Ég held ég hafi bara aldrei séð hann jafnglaðan.

Kannski að ég yrði á hann næst svona um jólaleytið.

Athugasemdir

[M, 8.9.2008 kl. 17:47]

þú ert frábær.

[Ragnheiður , 8.9.2008 kl. 19:48]

Hehe las þetta fyrir Steinar og hann flissaði hér....á ég að tala við hann þessa vikuna ?

[Sólveig Kristín Gunnarsdóttir, 8.9.2008 kl. 19:56]

Var thetta atvik thá "í blídu"  eda´" í strídu"?  

Ég hef einu sinni komid til Túnis og hafdi nákvæmlega sømu upplifun af hita. Fannst ég ganga inn í vegg af gufu, thegar ég steig út úr flugvélinni. Í minni skodunarferd fékk ég ógedslegt skordýr fast í krullurnar, og trilltist medan fólk var ad deyja úr hlátri yfir vidbrøgdunum í mér-

[Hrafnhildur Ýr Vilbertsdóttir, 8.9.2008 kl. 20:05]

[Helga skjol, 8.9.2008 kl. 20:57]

Garg hahahahahahahahahahaha, þú ert bara tærasta snilld kona þegar þú seigjir frá, þú ert alveg við að bjarga hjá mér deginum sem annars er búin að vera vægast sagt ÖMURLEGUR

[Hulla Dan, 8.9.2008 kl. 22:07]

 Það sem ég er búin að hlægja með honum (manninum þínum). Ekki að óförum þínum, heldur hvernig þú segir frá þessu. Þú ert bara rábær!

Knús til þín og eitt á þennan fyndna kall sem þú átt

[Elísabet Sigurðardóttir, 9.9.2008 kl. 08:12]

Snilld, ég sé þetta ljóslifandi fyrir mér .  Þú ert óborganlega skemmtilegur penni og persóna.  Ég skil manninn þinn mjög vel .

[Kallý, 9.9.2008 kl. 08:23]

ég hefði hlegið með honum

[Hrönn Sigurðardóttir, 10.9.2008 kl. 14:05]

Ég sé þig alveg fyrir mér!! Liggjandi í rykinu marflöt...... Ég hefði hlegið líka Eins gott að ég var ekki með þér!

[Guðríður Hrefna Haraldsdóttir, 13.9.2008 kl. 21:53]

Hahhahaha, þvílík snilldarsaga!!! Ég myndi ekki yrða á karlskömmina fyrr en á Þorláksmessu í fyrsta lagi ....