Fótaskortur á tungunni

Allir í minni fjölskyldu eru alveg ótrúlega mælskir og fljótfærir. Svo rammt kveður að þessu að við förum stundum fram úr okkur í öllum æsingnum við að komast nú örugglega að.

Amma mín fór einu sinni sem oftar í leikhús. Þegar hún kom heim sagði hún upprifin: "Mikið óskaplega er hann Lénharður leikrit gott fóget."

Pabbi minn blessaður var nú ekki sá alhandlagnasti þegar kom að því að flikka upp á eitthvað á heimilinu. Samt ákvað hann einu sinni að dúkleggja baðið. Fór í búð og keypti dúk og annað tilheyrandi og ætlaði svo að hefjast handa um kvöldið. Þá kom í ljós að honum hafði alveg láðst að kaupa dúkahníf. Hann lét það nú ekki aftra sér og ákvað að nota bara rakvélablað. Svo hófst hasarinn, pabbi kallaði á mömmu á fimm mínútna fresti til að biðja hana um að halda við þetta og aðstoða hann við hitt. Mamma varð að lokum þreytt á þessu og spurði pirruð hvort þau ættu ekki bara að fá dúkara daginn eftir. Þá móðgaðist pabbi og hreytti út úr sér: "Hvenær hefur þú séð dúkiblað með rakilagt?"

Kallý móðursystur minni þótti ákaflega góður bjór. Þetta var á þeim árum sem bara sjómenn í siglingum fengu bjór. Mágur hennar, hann Tobbi, fór í siglingu og Kallý tókst að plata út úr honum bjór. Þegar maðurinn hennar kom heim um kvöldið sagði hún hróðug: "Heldurðu að ég hafi ekki bjórað hann dobl um tobb!"

Ég og Matta systir fórum saman í sund og á eftir fórum við heim til hennar að fá okkur eitthvað að borða. Hún leitaði í ísskápnum og sagði svo: "Við getum auðvitað kjúklað í kaldan kroppling."

Þegar ég var svona 14-15 var Rán systurdóttir mín 6-7 ára. Einhvern tíma var ég að rella í pabba um eitthvað sem ég vildi fá. Þá kom Rán brunandi og sagði: "Ég líka, ég líka, afi má ég líka." Svo sneri hún sér að mér: "Helga, hvað varstu að biðja um?"

Svo einn að lokum, hann tengist ekki ættingjum mínum en er samt í miklu uppáhaldi hjá mér. Fyrir meira en 20 árum sinnaðist mér allverulega við kollega minn. Við lentum í hávaðarifrildi sem endaði með því að hann leit á mig alveg virkilega sár og sagði: "Mér sem hefur alltaf líkað svo vel við þig og svo ertu bara úlfur með lambhúshettu." Rifrildið endaði vitanlega í algjöru hláturkasti og enn man ég ekki út af hverju rifrildið var.

Þeir sem vilja fá skýringar á þessum ambögum hér að ofan geta beðið um þær í kommentakerfinu.

Athugasemdir

[Ragnheiður , 27.10.2008 kl. 22:22]

Ó ég sé mest eftir að hafa ekki skrifað upp slík mismæli eftir henni mömmu sálugu. Í svipin man ég bara eftir að hún kallaði mig einhverntímann : Grílsragning..!

Ég var ýmist kölluð Ragna eða gríslíngur...

Hugs..þarf að rifja meira upp.

Miklu betra að skrifa bara hérna í þínu skjóli, er eitthvað alveg lömuð og kem ekki upp orði á mínu bloggi

[Ragnheiður , 27.10.2008 kl. 22:23]

Þarna á vitanlega að standa : G R Í S L ragning

[Hrönn Sigurðardóttir, 27.10.2008 kl. 22:45]

"úlfur með lambhúshettu...." Ég sver það ég græt af hlátri!

[Sigrún Þorbjörnsdóttir, 27.10.2008 kl. 23:26]

 Ég lenti í því einu sinni að allt dekkið fór úr loftinu hjá mér. Það er svona þegar maður verður ólamáða...eða kannski óðamála!

[Sigrún Jónsdóttir, 27.10.2008 kl. 23:29]

Frábært. 

[Jenný Anna Baldursdóttir, 27.10.2008 kl. 23:30]

Ég græt líka úr hlátri.

Skýringar óþarfar.

[alva (IP-tala skráð) 27.10.2008 kl. 23:33]

já...alltaf gott að kjúkla í kaldan kroppling

Ég man eftir fólki sem heita Rósa og Sassi ( kölluð þessum ósköpum ) það var stundum ruglast og talað um Sósu og Rassa....

[Sólveig Kristín Gunnarsdóttir, 28.10.2008 kl. 00:14]

Frábært, ég skellihló.

[Kristín Björg Þorsteinsdóttir, 28.10.2008 kl. 15:38]

 Að hneppa hrossið - það gerist stundum hjá mér. 

[Birna Dis Vilbertsdóttir (IP-tala skráð) 28.10.2008 kl. 17:56]

.Kona ein sem bjó úti á landi kom æðandi í hús þar sem konur sátu að kaffidrykkju.Hún var óðamála og var að segja fréttir af manni sem var fluttur suður með sjúkrabíl á spítala.BANK,BANK.hurð rifinn upp og hrópað stelpur ,stelpur vitiði bara hvað ?????? Hann Gulli Gull var suddaður fluður

[Helga Magnúsdóttir, 28.10.2008 kl. 18:12]

Gaman að heyra að það er ekki bara Ferjuvogsslektið sem veður í vitleysunni.