Það á að gefa börnum brauð

21.12.2008 | 17:50

Það á að gefa börnum brauð

Börn eru aldrei yndislegri en á jólum og í aðdraganda þeirra. Þegar hann Styrmir minn var 6-7 ára ákvað ég að halda smá jólaboð fyrir hann og þau systkinabörn mín sem voru á svipuðum aldri og hann. Ég tók til smákökur og hitaði kakó og leigði jólateiknimynd. Þessi jólamynd var um lítinn strák sem átti lítinn asna. Asninn var svo lítill að pabba stráksins fannst ekki nokkurt gagn að honum. Því skipaði pabbi stráksins honum að fara til borgarinnar og selja asnann og það slátraranum ef ekki vildi betur.

Stráksi var vitanlega óskaplega sorgmæddur yfir þessu og lagði af stað með asnann. Þegar til borgarinnar var komið vildi enginn sjá þennan litla asna svo allt leit út fyrir að hann myndi lenda hjá slátraranum. En í þann mund sem slátrarinn er að kaupa asnann koma ung hjón og konan barnshafandi. Þau voru fátæk en vildu gjarnan kaupa asnann því hann var svo ódýr. Myndin endaði svo á því að þessi hjón, sem marga er aflaust farið að gruna hver eru, leggja af stað í langferð undir skini stærrar stjörnu.

Ég held að ég hafi sjaldan gert meiri mistök en þegar ég leigði þessa spólu. Krökkunum fannst þetta allt saman svo sorglegt að ég sat uppi með fulla stofu af háskælandi börnum og þurfti að snýta og hugga í lengri tíma.

Mörgum árum seinna keypti ég jólateiknimynd, maður lærir ekki af reynslunni, handa Úlla en það var Jólasaga Dickens með Andrési, Jóakim, Mikka og öllu genginu. Jóakim var að sjálfsögðu Scroooge og var hinn versti ef eitthvað var minnst á jól. Úlli horfði opinmynntur á myndina og sneri sér svo að mér og sagði stórhneykslaður: "Rosalega er hann Jóakim mikil jólahatönd." Við höfum horft á þessa mynd fyrir hver jól síðan og alltaf fær Úlli að heyra brandarann um jólahatöndina.

Flokkur: Bloggar | Facebook

Athugasemdir

Jenný Anna Baldursdóttir, 21.12.2008 kl. 20:35

Æ, Jólahatönd !!!

Þetta minnir mig á þegar sonur minn sagði, mjög lítill; "Nú höfum við hér mikil jól, en enga gleði"

Þá var sko pabbi hans búinn að vera að saga jólatrésfót til í marga klukkutíma, í rosalegu geðvonskukasti. Við barnið fórum undan í flæmingi meðan heimilisfaðirinn skrattaðist á tréfætinum með sögina. Þegar loksins var búið að koma trjáfjandanum í upprétta stöðu var afar lítið eftir af jólagleðinni..

Hildur Helga Sigurðardóttir, 21.12.2008 kl. 23:14

Helga skjol, 22.12.2008 kl. 07:12

Gleðileg jól og farsæld á nýju ári, óska ég ykkur Helga mín. Jólakveðja

Kristín Gunnarsdóttir, 22.12.2008 kl. 08:03

Jólahatönd...þetta er ágætis nafn á hann...

Ásta Björk Hermannsdóttir, 22.12.2008 kl. 13:35

ég er búin að leita út um allt að teiknimyndinni þar sem Jóakim er Scrooge. Langar miiiiikið að sjá hana því ég horfði alltaf á hana þegar ég var krakki... er séns á að fá hana lánaða???

Kallý, 22.12.2008 kl. 22:09