Ekki keyra á gamlar konur

7.4.2009 | 22:17

Fyrir þó nokkuð mörgum árum var ég að keyra eftir Langholtsveginum í snjómuggu og lélegu skyggni. Skyndilega birtist vera fyrir framan bílinn og skellur sem gaf til kynna að ég hefði keyrt á einhvern. Ég hentist út úr bílnum og sá að ég hafði keyrt á gamla konu. Hún var illa haldin, blóðug á höfði og fótbrotin. Ég beið eftir lögreglu og sjúkrabíl og hef aldrei á ævinni skolfið jafnmikið.

Næstu daga keyrði ég aftur og aftur yfir konuna. Þegar ég var að sofna hrökk ég upp og fannst ég hafa keyrt á hana aftur. Þegar mér tókst að sofna fékk ég endalausar martraðir af sama toga. Ég var almennt svo gjörsamlega miður mín að ég endaði með að fá róandi og svefnlyf hjá lækninum mínum til að geta náð að jafna mig eftir þessar hrakfarir.

Tveimur til þremur dögum seinna fór ég upp á spítala með blóm til að biðjast afsökunar og Stjáni kom með mér til halds og trausts.

Ég stamaði og hikstaði og leið alveg ferlega illa. Ég komst að því að blessuð konan bjó í nágrenni við mig og þá fæddist þessi endemis setning: Láttu mig bara vita ef ég get gert eitthvað fyrir þig, ég er nefnilega á bíl eins og þú veist. Hver vissi betur en Þessi kona að ég væri á bíl. Ég fattaði strax hvað ég hafði látið út úr mér og kvaddi í flýti og forðaði mér út. Stjáni skammaði mig ekki einu sinni fyrir vitleysuna þar sem hann sá hvað ég skammaðist mín og að á það væri ekki bætandi. Sem sagt: Ekki keyra á gamlar konur. Það kann ekki góðri lukku að stýra

Flokkur: Bloggar | Breytt s.d. kl. 23:10 | Facebook

Athugasemdir

Hugsa sér þá sem verða fyrir þeirri ógæfu að bana einhverjum í umferðinni. Um það heyrist aldrei en það hlýtur að hvíla á mönnum ævilangt. Og getur komið fyrir hvern sem er.

Sigurður Þór Guðjónsson, 7.4.2009 kl. 22:44

Æj...vont þegar maður segir eitthvað alveg óviðeigandi. Óvart og út úr stressi

Ragnheiður , 7.4.2009 kl. 23:49

Fínt ég las þetta, hafði nefnilega verið að pæla í hvort ég ætti...

Eygló, 8.4.2009 kl. 01:32

hahaha "ég er nefnilega á bíl eins og þú veist...." Ferlega fyndið!

Hrönn Sigurðardóttir, 8.4.2009 kl. 08:56

Mér finnst að þú eigir að skrifa eina sögu á dag. Sögurnar þínar eru hver annarri betri!

Lára Hanna Einarsdóttir, 8.4.2009 kl. 11:42

innlitskvitt - gott að lesa bloggið þitt.

Sigrún Óskars, 8.4.2009 kl. 12:05

Sorry en þetta með að þú sért á bíl er alveg bráðfyndið :) heheheh

Margrét Össurardóttir (IP-tala skráð) 8.4.2009 kl. 12:41

inná með Helgu. Ein saga á dag, kæmi skapinu í lag (þótt ekki væri nema sossum einu sinni í viku - hálfsmánaðarlega - einu sinni í mánuði. Prútta ekki meir. :) Takk fyrir "hingað til" þótt þú gegnir okkur ekki í neinu.

Eygló, 8.4.2009 kl. 13:30

Hæ elsku Helga mín. Það er ávalt gaman að kíkja hérna á bloggið hjá þér vinur. Það er rosa fínt að heyra hljóðið í þér og sjá að þú ert svona hress. Takk vinur fyrir gott blogg og hresst.