Oft þarf að gera meira en gott þykir

Þegar faðir minn var ungur skipstjóri var hann á síldveiðum fyrir norðan land. Það gerði aftakaveður og komst hann í var á Raufarhöfn. Þegar hann var lagstur við bryggju kom á fund hand örvæntingarfullur faðir sem bað hann um að reyna að komast með fárveikan son hans til læknis en enginn læknir var þá á staðnum. Pabbi tók vel í þessa beiðni, reyndi að komast en óveðrið var slíkt að hann varð frá að hverfa.

Pabbi var á nýjum báti og því með eins fullkomið apótek og hægt var að fá á þeim tíma. Hann ákvað því að gera sjálfur hvað hann gæti fyrir drenginn. Veikindi drengsins voru þau að hann hafði fengið stóra flís í lærið og greri mikið og var hann kominn með blóðeitrun. Pabbi fór með þeim feðgum heim til þeirra og lét leggja drenginn á eldhúsborðið. Síðan "frysti" hann svæðið þar sem flísin var og skar á. Hann varð að fara mjög varlega því ekki mátti sprengja graftarpokann heldur varð að ná honum heilum. Þetta tókst vonum framar svo pabbi saumaði fyrir og fór um borð. Daginn eftir kom faðirinn um borð til hans og átti ekki orð yfir þakklæti sitt. Drengurinn var orðinn nánast hitalaus og allur að koma til.

Þessa sögu fréttum við fjölskyldan ekki fyrr en rúmum 20 árum seinna þegar Atli bróðir náði sér í konu frá Raufarhöfn og amma hennar fattaði strax hver pabbi var. Svo þótti okkur líka svo merkilegt hvernig hann pabbi, með stærstu hendur í heimi, fór að því að gera svona vandasama aðgerð. Það er greinilega allt hægt.

Athugasemdir

[Valgeir Matthías Pálsson (IP-tala skráð) 20.12.2009 kl. 20:16]

Góð saga af pabba þínum Helga mín. Rosalega hefur hann verið góður. Frábær endalok á góðu verki. Gaman að sjá þig hérna á bogginu og gaman að heyra frá þér. Gleðileg jól ef ég sé þig ekki meira hérna á blogginu og hafðu það sem best um jólin.

[Helga Magnúsdóttir, 20.12.2009 kl. 20:20]

Takk fyrir, Valgeir minn. Gleðileg jól til þín og þinna og farsælt komandi ár.

[Ágúst Ásgeirsson, 20.12.2009 kl. 20:56]

Takk fyrir þessa sögu. Hvaða ár ætli þetta hafi gerst? Og á hvaða báti var faði rþinn skipstjóri? Í mínu ungdæmi á Raufinni og á síldarárunum um og upp úr 1960 þekkti ég hvern einasta dall með nafni, jafnvel áttaði maður sig á hvaða bátur væri á ferð er þeir áttu enn eina mílu eða tvær til hafnar.

[Helga Magnúsdóttir, 20.12.2009 kl. 20:59]

Þetta var á stríðsárunum eða rétt eftir þau. Báturinn sem pabbi var á á þessum tíma hét Elsa.

[Þorvaldur Guðmundsson, 20.12.2009 kl. 21:48]

Pabbi þinn var vandaður og góður karl Helga og frábær skipstjóri.

[Valdís Skúladóttir, 21.12.2009 kl. 02:57]

Yndisleg saga  af föður þínum.

            Kv.Vallý

[Ásthildur Cesil Þórðardóttir, 21.12.2009 kl. 09:10]

Mikið er þetta dásamlega falleg saga Helga mín.  Ég held að maður geti allt bara ef nægur vilji og einbeittur ásetningur er fyrir hendi.  Takk fyrir að deila þessari sögu með okkur.